تنويه: نشر هذه الفكرة أول مرة علي صفحتي علي فيسبوك بتاريخ 2 سبتمبر 2025
رحت أدفع مصاريف خدمة بدري بـ45 يوم قلت أخلص منها وأقسطها على 6 شهور بكرت البنك بما إني قريب من المكان
لقيت الشركة عايزة تفرض علي 2% رسوم إضافية لأن المعاملة كبيرة
الموقف خلاني أفكر في التدفق النقدي…
هل توفير 2% من رسوم الدفع يستحق تأخير التحصيل 45 يوم؟
قلت لهم: خلاص، هاجي أدفع كاش بعد 45 يوم وهو الحد الأقصى المسموح للدفع
وقعدت أفكر:
إزاي شركة ممكن تضيع على نفسها 45 يوم من السيولة المضمونة وعميل مضمون عشان توفر 2% رسوم؟
لو الفلوس دخلت بدري كان هايبقي عندهم مرونة مالية أكبر
لو مش محتاجينها في التشغيل ممكن يحطوها في حساب توفير أو صندوق
ممكن يستخدموها في سداد التزامات داخلية أو خارجية ويوفروا فوائد أو تكاليف تمويل
ومع عدد كبير من المعاملات حجم التدفقات المالية نفسه ممكن يحسن موقفهم البنكي ويرفع قدرتهم الائتمانية
المشكلة هنا ليست الـ2% فقط
المشكلة طريقة التفكير؛ الشركة فكرت إزاي تقلل مصروف مباشر عليها: 2% رسوم منصة الدفع لكن في ظني ما حسبتش تكلفة القرار بالكامل
هي خسرت 45 يوم من تدفق نقدي كان ممكن يدخل لها بشكل مؤكد
وخسرت في المقابل فرص استخدام السيولة دي سواء في التشغيل أو سداد التزامات أو حتى استثمارها
والأهم.. ممكن تخسر العميل نفسه لأن خلال الـ45 يوم دول وارد جدًا ألاقي بديل أفضل
(بالفعل احد المنافسين لقيت له إعلان ووصلنا لمراحل متقدمة في المفاوضات وبعدين وقفت مفاوضات لاسباب ليها علاقة بالبياع)
وساعتها ممكن حد من الشركة يضطر يكلمني عشان يرجعني وغالبًا هيقدم لي خصم أكبر من الـ2% اللي كانوا بيحاولوا يوفروا بيهم في البداية ( الحقيقه استخدمت تطورات مفاوضاتي مع الشركة المنافسة للحصول علي تخفيض 2% علي الاشتراك والتجديد كل سنة 3% )
يعني ببساطة وفروا 2% في عملية واحدة، لكن ممكن يدفعوا أكتر منها بعدين عشان يسترجعوا العميل (دا حصل بالفعل)
تكلفة رسوم الدفع مش هيا التكلفة الوحيدة
ملحوظة: أنا متفهم إن الـ2% دي ممكن تكون نسبة البنك أو منصة الدفع ولكن دي تكلفة تشغيل طبيعية لأي شركة بتبيع وبتحصل وممكن معالجته بأكثر من شكل
الفكرة مش ان كل الرسوم لازم الشركة تتحملها وتاكل من هوامشها لكن إن القرار لازم يتحسب على أساس الصورة كاملة، مش على أساس المصروف المباشر فقط
حتى البنوك نفسها بتتعامل مع حجم المعاملات والسيولة كجزء من العلاقة مع العميل وبتقدم منتجات وخدمات تساعد الشركات على تمويل عملياتها اليومية وتحسين شروطها كلما زاد حجم تعاملاتها
التحصيل والمبيعات والتمويل مرتبطين ببعض
في رأيي المشكلة هنا مش بس إن القرار بيعقد تجربة العميل وبيخسر الشركة أكتر بكتير من الـ2% بتوع عمولة الدفع المشكلة الأعمق هي قصر النظر من الشركة وعدم وجود استراتيجية شاملة تجمع بين أنشطة التحصيل والمبيعات والتمويل
لأن في النهاية التحصيل مش مجرد طريقة تستلم بيها الفلوس والمبيعات مش مجرد إنك تقفل عملية بيع علي CRM والتمويل مش مجرد إنك تدور على فلوس وقت ما تحتاجها
التلاتة مرتبطين ببعض وأي قرار في واحد منهم يأثر بشكل مباشر على الاتنين التانيين
